Rasaning tyas kayungyun
Angayomi lukitaning kalbu
Gambir wanakalawan hening ing ati
Kabekta kudu pitutur
Sumingkiring reh tyas mirong
Den samya amituhu
Ing sajroning Jaman Kala Bendu
Yogya samyannyenyuda hardaning ati
Kang anuntun mring pakewuh
Uwohing panggawe awon
Ngajaba tyas rahayu
Ngayomana sasameng tumuwuh
Wahanane ngendhakke angkara klindhih
Ngendhangken pakarti dudu
Dinulu luwar tibeng doh
Beda kang ngaji pumpung
Nir waspada rubedane tutut
Kakinthilan manggon anggung atut wuri
Tyas riwut ruwet dahuru
Korup sinerung agoroh
Ilang budayanipun
Tanpa bayu weyane ngalumpuk
Sakciptane wardaya ambebayani
Ubayane nora payu
Kari ketaman pakewuh
Rong asta wus katekuk
Kari ura ura kang pakantuk
Dandhanggula lagu palaran sayekti
Ngleluri para leluhur
Abot ing sih swami karo
Galak gangsuling tembung
Ki Pujangga panggupitanipun
Rangu rangu pamanguning reh harjanti
Tinanggap prana tumambuh
Katenta nawung prihatos
Wartine para jumhur
Pamawasing warsita datan wus
Wahanane apan owah angowahi
Yeku sansaya pakewuh
Ewuh aya kang linakon
Sidining Kala Bendu
Saya ndadra hardaning tyas limut
Nora kena sinirep limpating budi
Lamun durung mangsanipun
Malah sumuke angradon
Ing antara sapangu
Pangungaking kahanan wus mirud
Morat marit panguripaning sesami
Sirna katentremanipun
Wong udrasa sak nggon enggon
Kemat isarat lebur
Bubar tanpa daya kabarubuh
Paribasan tindhem tandhaning dumadi
Begjane ula dahulu
Cangkem silite anyaplok
Ndhungkari gunung gunung
Kang geneng geneng padha jinugrug
Parandene tan ana kang nanggulangi
Wedi kalamun sinembur
Upase lir wedang umob
Kalonganing kaluwung
Prabanira kuning abang biru
Sumurupa iku mung soroting warih
Wewarahe para Rasul
Dudu jatining Hyang Manon
Supaya pada emut
Amawasa benjang jroning tahun
Windu kuning kono ana wewe putih
Gegamane tebu wulung
Arsa angrebaseng wedhon
Rasane wus karasuk
Kesuk lawan kala mangsanipun
Kawisesa kawasanira Hyang Widhi
Cahyaning wahyu tumelung
Tulus tan kena tinegor
Karkating tyas katuju
Jibar jibur adus banyu wayu
Yuwanane turun temurun tan enting
Liyan praja sanya sayuk
Keringan saenggon enggon
Tatune kabeh tuntum
Lelarane waluya sadarum
Tyas prihatin ginantun suka mrepeki
Wong ngantuk anemu kethuk
Isine dinar sabokor
Amung padha tinumpuk
Nora ana rusuh colong jupuk
Raja kaya cicancangan aneng nyawi
Parandene tan cinolong
Diraning durta katut
Anglakoni ing panggawe hayuning budi
Budyarja marjayeng limut
Amawas pangesthi awon
Nanggal pakarti dudu
Pradapaning parentah ginugu
Mring pakaryan saregep tetep nastiti
Ngisor ndhuwur tyase jumbuh
Tan ana wahin winahon
Ngratani sapraja agung
Keh sarjana sujana ing kewuh
Nora kewran mring caraka agal alit
Pulih duk jaman runuhun
Tyase teteg teguh tanggon